Tag: Genders

Dis new order from President Trump, dey “dangerous” Julia Ehrt, executive director for ILGA World, one global federation of LGBT+ organisations tok, and add say e fit “snowball into reversing historic advances for global LGBTI equality”.

She fear say e “set precedent wey fit to inspire similar initiatives for oda kontris” and say “dis kian tok from di new US president go make authoritarian leaders across di world to scale up dia game of making minorities scapegoating”.

However, in some ways President Trump executive order echo acts by Argentina president, Javier Milei, wey come office for December 2023.

President Milei close di kontri Women, Gender and Diversity Ministry and di National Institute Against Discrimination, Xenophobia and Racism (INADI), and im say dis dey necessary to reduce “unnecessary public spending”.

And President Trump order don begin attract public support from some outside US.

“Trump na strong and influential force,” Alma Sanchez, 25-year-old doctor for Honduras, tok. “Biden administration finance gender and diversity programmes for our kontri – Trump executive order mean say financing for dis kain programme for kontris like Honduras go stop, dat na good tin for us.”

Sanchez na part of Generacion Celeste, one conservative lobby group for Honduras for pipo wey dey under 30.

“Our President Xiomara Castro waste resources dey appoint secretary of gender inclusivity and diversity, following lead from Biden administration.”

Sanchez hope say her kontri go now change path and follow President Trump lead instead. “Honduras na Christian kontri, wit traditional values. Resources suppose go to education, and healthcare.”

Dis move also receive support from groups wey dey criticise di concept of gender identity, as well as some religious groups.

Bishop John Praise Daniel, vice-president of Pentecostal Fellowship of Nigeria, tell Voice of America say im welcome executive order wia gender roles dey clarified as binary – male and female – and not fluid.

“We no need dat confusion,” im say. “Bring back righteousness, order and sanity to society.”

For United States, about 1.6% of adults identify as transgender or non-binary, according to Pew Research Centre. And for one 2023 global survey wey Statistica do, 3% of respondents from 30 kontris identify demsef as transgender or non-binary.

Some global human rights campaigners dey worry say di US executive order fit affect grassroots organisations for kontris wia dem get only small support for trans pipo.

No legal recognition of transgender pipo for some kontirs, like Kenya, and small local organisations rely on US Agency for International Development (USAID) for financial support for LGBT+ pipo.

Groups wey dey support women and gender equality dey also collect funding from USAID – for 2023, President Biden budget bin request for approximately $2.6 billion for foreign assistance programmes wey promote gender equity and equality worldwide, more dan double di amount from 2022.

But “Trump executive order mean say important work wey rely on USAID dey under threat of being defunded”, Patsey Githinji, one transgender activist and influencer for Nairobi tok.

“Funding dey help vulnerable communities for Kenya connect wit oda.

E dey also help provide healthcare and psychosocial support,” she tok.

International gender experts also fear spillover of anti-transgender rhetoric to oda parts of di world.

India officially recognise “Hijra” as third gender, afta Supreme Court order for 2014.

Dem fit mark dis identity on official documents including passports.

However di US executive order dey worry many for South Asia, Rohit K Dasgupta, associate professor of gender and sexuality for London School of Economics and Political Science and co-author of Desi Queers, say.

“I don tok to many queer and trans activists for India wia I dey mainly research and work. Dem dey share concerns say dat kain policies dey hardly remain inside US borders,” im tok. “Dis rollback fit disproportionately impact di most vulnerable, including trans pipo of colour.”

US executive orders dey mostly get limitations and dia implementation fit dey delayed or blocked by legal challenges or opposition from Congress.

And although President Trump act sharply, e go take some time to work out wetin dis mean not just for Americans, but also ppipo for di rest of di world.